Fomento do acceso á condición de persoa socia - 2026

TR802J - Fomento do acceso á condición de persoa socia - 2026

Data de publicación: 18/02/2026

Data inicio de solicitude: 02/03/2026

Data remate de solicitude: 16/09/2026

Obxecto

Esta Orde ten por obxecto publicar as bases e convocar as axudas para o fomento do acceso á condición de persoas socias traballadoras ou de traballo, de cooperativas ou de sociedades laborais, así como ao fomento do acceso de persoas emprendedoras por conta propia á condición de socias de cooperativas.

Este acceso facilítase mediante o financiamento das achegas económicas ao capital social que se debe desembolsar para a incorporación como socio ou socia.

Características da axuda

As subvencións poderán ascender ás contías seguintes:

a) Para as persoas beneficiarias previstas no artigo 30.1, letras a), b), c) e d), e no artigo 30.2, ata 6.000,00 €.

b) Para as persoas beneficiarias previstas no artigo 30.1, letra e), ata 3.000,00 €.

As contías sinaladas incrementaranse nas porcentaxes que se sinalan a seguir, que son acumulables entre si:

a) Un 25 % se a persoa beneficiaria é unha muller.

b) Un 25 % se a persoa beneficiaria ten discapacidade ou se encontra en situación ou risco de exclusión social.

c) Un 25 % se a persoa incorporada ten unha discapacidade con especiais dificultades para a súa inserción laboral, que cumpra as condicións definidas.

d) Un 25 % se a persoa beneficiaria ten máis de 45 anos.

e) Un 25 % se a persoa beneficiaria ten a condición de emigrante retornada.

f) Un 25 % se a persoa ten a condición de trans.

g) Un 25 % no caso de que o centro de traballo ao cal se incorpora a persoa socia estea situado nun concello rural.

h) Un 25 % se se trata dunha cooperativa xuvenil.

i) Un 25 % se se trata de unha entidade de nova creación constituída inicialmente con catro ou máis persoas socias traballadoras.

Para a aplicación dos citados incrementos, teranse en conta as circunstancias que consten acreditadas no momento de ditar a proposta de resolución.

Cando a dedicación da persoa incorporada sexa a tempo parcial ou en condición de fixo descontinuo a contía máxima dos incentivos previstos, a contía máxima dos incentivos dos puntos anteriores reducirase ao 50 %.

As contías referidas nos anteriores puntos en ningún caso poderán ser superiores ás que subscriba o socio ou socia en concepto de achega de capital social e cota de ingreso, ou de accións ou participacións sociais segundo o caso, pola súa incorporación. Para estes efectos, o importe subvencionable da achega económica ao capital social é o que conste nos estatutos sociais, nas escrituras ou por acordo da asemblea como achega obrigatoria mínima no momento da súa incorporación. Unicamente se terán en conta os importes desembolsados durante o período recollido na convocatoria para a subvencionabilidade do gasto, sempre que, como mímino, se subscribise e desembolsase o 25 % mínimo legal establecido.

Persoas beneficiarias

Poderán ser persoas beneficiarias as persoas que accedan á condición de persoa socia traballadora ou de traballo dunha cooperativa ou sociedade laboral con carácter indefinido, que desenvolvan a súa actividade nun centro de traballo situado na Comunidade Autónoma de Galicia e que no momento da súa incorporación, que se deberá producir dentro do período de execución establecido, cumpran algunha das condicións seguintes:

a) Ser persoas desempregadas inscritas como demandantes de emprego, nos termos que se indicados.

b) Ser persoas socias a proba da cooperativa á cal se incorporan.

c) Ser persoas asalariadas da cooperativa ou sociedade laboral á cal se incorporan.

d) Ser persoas asalariadas dunha empresa que se transforme nunha cooperativa ou sociedade laboral, sempre que non teñan a condición de socias da empresa transformada.

e) Ser persoas socias traballadoras ou de traballo dunha cooperativa ou sociedade laboral a tempo parcial que accedan á mesma condición a tempo completo.

Tamén poderán ser beneficiarias as persoas que, sendo desempregadas e inscritas como demandantes de emprego, emprendan unha actividade por conta propia e se incorporen nunha cooperativa como persoas socias con carácter indefinido, con compromiso de exclusividade, para comercializaren os seus produtos, obteren subministracións, servizos e a asistencia técnica que precisen, sempre que teñan o seu domicilio social e fiscal en Galicia. A incorporación como persoa socia na cooperativa deberá producirse dentro do período de execución establecido. Entre o inicio da actividade por conta propia e a dita incorporación non poden ter transcorrido máis de dous anos.

Publicación boletín

Ficha informativa sede