Bono Nova Oportunidade das persoas trabaalldoras autónomas (TR790A) 2025

IMPORTANTE! Convocatoria 2025 aberta entre o 24 de xaneiro e o 30 de setembro de 2025

Infografía explicativa

Finalidade do Programa

Este Programa céntrase en promover as axudas para as persoas traballadoras autónomas que cesaron na súa actividade e van volver a emprender un negocio como persoas traballadoras autónomas, sendo demandantes de emprego no momento previo á nova alta como persoa traballadora autónoma.

Trátase de facilitar a volta á actividade económica á persoa emprendedora a quen lle foi mal no seu anterior negocio pero ten a experiencia práctica e a iniciativa de volver emprender, no mesmo ou diferente sector, a través do Bono nova oportunidade para axudar á posta en marcha do novo negocio.

A axuda Nova oportunidade será dunha contía de 7.500 € dirixida ás persoas que cumpran os requisitos establecidos, contía que se incrementará en 500 € no caso de que a beneficiaria sexa unha muller.

Requisitos para ser beneficiaria

a) Causar alta no Réxime Especial de Traballadores Autónomos (RETA ou calquera outro réxime especial por conta propia da Seguridade Social ou en mutualidade de colexio profesional) no período do 31 de outubro de 2024 ao 30 de setembro de 2025, e atoparse de alta no momento da solicitude.

b) Ter unha alta inicial no RETA, en calquera outro réxime especial por conta propia da Seguridade Social ou mutualidade, antes desta nova alta, dentro dos últimos 5 anos desde a data da publicación desta Orde.

c) Cotizar anteriormente a esta nova alta, polo menos durante 3 meses ininterrompidos na súa vida laboral no Réxime Especial de Traballadores Autónomos (RETA ou en calquera outro réxime especial por conta propia da Seguridade Social ou en mutualidade de colexio profesional).

d) Estar rexistrada como persoa demandante de emprego nos servizos públicos de emprego con carácter previo á nova alta, e carecer de ocupación efectiva, non ter contrato laboral en vigor e atoparse en tal situación na data inmediatamente anterior á de inicio da actividade laboral, mantendo o alta no RETA, en calquera outro réxime especial por conta propia da Seguridade Social ou na mutualidade correspondente, no momento da tramitación, e durante un tempo mínimo de vinte e catro (24) meses desde a nova alta.

e) Transcorrer un período mínimo de seis (6) meses entre a nova alta como persoa traballadora autónoma no RETA, en calquera outro réxime especial por conta propia da Seguridade Social ou na mutualidade correspondente, e a anterior baixa no RETA, en calquera outro réxime especial por conta propia da Seguridade Social ou na mutualidade correspondente.

f) Ter o domicilio fiscal en Galicia, con anterioridade á nova alta como persoa traballadora autónoma, e desenvolver a súa nova actividade económica ou profesional en Galicia.

g) Ter iniciada a actividade con anterioridade á presentación da solicitude de subvención.

h) Estar dado de baixa no Imposto de Actividades Económicas da actividade precedente.

Acceso á ficha da axuda