A Xunta salienta a futura Estratexia de emprendemento e a orde única de axudas dotada de 41 M€ como piares do apoio ao traballo autónomo en 2026

O conselleiro de Emprego, Comercio e Emigración, José González, acompañado polo secretario xeral de Emprego e Relacións Laborais, Pablo Fernández, a directora xeral de Traballo Autónomo e Economía Social, Marta Mariño, e o director da Axencia de Turismo de Galicia, Xosé Merelles, participaron na entrega de galardóns ás persoas traballadoras autónomas distinguidas no marco do XV Congreso da Asociación Intersectorial de Autónomos/as e Pequenas Empresas de Galicia (APE).

José González sinalou a importancia de seguir traballando da man de entidades como APE e salientou a aposta por fortalecer en Galicia un ecosistema no que emprender sexa máis doado, seguro e atractivo a través de ferramentas clave como a futura Estratexia de emprendemento ligado ao territorio e a orde unificada de axudas para persoas autónomas, que volverá convocarse en 2026 cun orzamento próximo aos 41 millóns de euros.

O Goberno autonómico pon en valor o importante peso deste colectivo no mercado laboral galego, con máis de 212.300 afiliados e afiliadas, o que sitúa Galicia como a terceira comunidade con maior proporción de emprego por conta propia, case catro puntos por riba da media estatal. Ademais, é a segunda comunidade autónoma cun maior peso de persoas autónomas empregadoras —3.500 máis que hai un ano—e destaca a relevancia de sectores como o comercio, a construción, o primario ou a hostalaría como piares do tecido autónomo.

Fronte aos retos que afronta o colectivo nun contexto no que o Executivo central continúa acumulando cargas sen ter en conta a realidade deste colectivo, segundo remarca o conselleiro, a Xunta mantén o seu compromiso de escoitar, atender e acompañar aos axentes económicos que sosteñen o mercado laboral, crean emprego e xeran impacto no territorio, así como seguir avanzando na simplificación administrativa e na redución de burocracia.

Nesa liña, a orde unificada de axudas para persoas autónomas de 2026 volverá integrar os principais programas de apoio, que abranguen desde o inicio da actividade ata a consolidación e mantemento, incluíndo medidas de conciliación e axudas para aquelas persoas que queiran retomar un proxecto emprendedor tras unha etapa previa como autónomas.

Entre as novidades, a cota cero para novas persoas autónomas durante 12 meses estenderase ata os 24 no caso das que se inicien en actividades vinculadas á agricultura, á gandaría ou á silvicultura. Ademais, o bono remuda incrementarase un 20 %, ata 1,5 millóns de euros, para favorecer a continuidade dos negocios e garantir a remuda xeracional.

O tecido autónomo tamén xogar un papel fundamental na futura Estratexia de emprendemento ligado ao territorio, con horizonte en 2030 e da que a Xunta vén de presentar as liñas mestras. Entre os seus eixos principais, salientou o foco na remuda xeracional —con novas medidas como unha bolsa de negocios en traspaso e un escaparate dixital—, o impulso e especialización da Rede de polos —fortalecendo o labor das 15 oficinas espalladas por Galicia que xa atenderon máis de 5.200 proxectos— e a aposta por atraer talento da Galicia Exterior.