Subvencións para actuacións de mellora das infraestruturas dos establecementos turísticos de aloxamento e de restauración - 2023


  • 13/01/2023
  • 13/02/2023
Accede dende aquí

TU503A - Subvencións para actuacións de mellora das infraestruturas dos establecementos turísticos de aloxamento e de restauración - 2023

Data de publicación: 13/01/2023

Data inicio de solicitude: 14/01/2023

Data remate de solicitude: 13/03/2023

Obxecto

Esta resolución ten por obxecto publicar as bases e convocar as subvencións destinadas á mellora da infraestrutura turística da Comunidade Autónoma de Galicia mediante a incentivación para a mellora das infraestruturas dos establecementos de aloxamento turístico e de restauración.

En concreto, son actuacións subvencionables as que se realicen en calquera dos seguintes tipos de establecementos turísticos:

a) Os establecementos hoteleiros, campamentos de turismo, establecementos de turismo rural, apartamentos turísticos e albergues turísticos de acordo co artigo 55.1 da Lei 7/2011, do 27 de outubro.

b) As empresas de restauración que se enmarquen dentro do grupo I (só restaurantes) do artigo 77 da Lei 7/2011, do 27 de outubro.

Características da axuda

Serán obxecto de subvención, de conformidade co que se establece na resolución, os seguintes investimentos:

1. Actuacións destinadas a mellorar as condicións de accesibilidade e supresión de barreiras arquitectónicas.

2. Obras destinadas á mellora das instalacións coa finalidade de obter certificacións de calidade, en especial o Q de Calidade Turística.

3. Actuacións destinadas á adaptación ás modificacións normativas e á mellora da clasificación do establecemento que supoñan un incremento de categoría.

4. Actuacións de renovación e modernización das instalacións e embelecemento do contorno da instalación.

5. Equipamentos mobles necesarios para o funcionamento.

6. Actuacións de mellora da climatización que favorezan a sustentabilidade coa implementación de medidas de aforro enerxético, así como a instalación ou mellora de sistemas de extracción e renovación do aire.

7. Actuacións de dixitalización dos sistemas de xestión e comercialización do establecemento.

8. Adaptación dos sistemas de seguridade e saúde na prestación de servizos.

O investimento neto admitido será de ata 100.000 €. No caso de que o orzamento de execución do proxecto presentado coa solicitude de subvención sexa superior ao dito límite, requirirase a persoa solicitante para que reaxuste o proxecto que se vai executar ao citado límite.

Os proxectos ou actuacións que se presenten deberán ser técnica, económica e financeiramente viables, e os criterios de avaliación que servirán de base para a determinación da preferencia na concesión da subvención serán por orde decrecente os seguintes, tendo en conta a valoración específica que se lle atribúe a cada un deles:

a) Antigüidade. Máximo 18 puntos. 

b) Grao de investimento. Máximo 15 puntos.

c) Impacto no emprego. Máximo 10 puntos.

d) Tamaño da entidade ou empresa. Máximo 15 puntos.

e) Que a empresa ou entidade estea en posesión dalgún certificado de calidade para o sector turístico referido ao establecemento para o cal se pide a axuda: 16 puntos. 

f) Que a empresa ou entidade estea en posesión dalgunha certificación ambiental internacionalmente recoñecida referido ao establecemento para o cal se pide a axuda: 16 puntos.

g) Que a empresa ou entidade teña implantado plan de formación/plan de igualdade: 10 puntos.

Os proxectos poderán acadar unha subvención de ata o 60 % sobre o orzamento do investimento subvencionable.

O importe máximo da axuda a cada entidade beneficiaria será de 60.000 €.

A porcentaxe de axuda sobre o investimento subvencionable calcularase con base na puntuación que acaden os proxectos presentados, segundo se detalla a seguir:

Puntos Porcentaxe axuda
80 - 100 puntos 60%
60 - 79 puntos 50%
30 - 59 puntos 40%

As solicitudes cunha puntuación inferior a 30 puntos non poderán obter subvención.

Persoas beneficiarias

Poderán ser persoas beneficiarias das subvencións as persoas físicas e xurídicas titulares de establecementos turísticos de aloxamento e de restauración que reúnan os requisitos establecidos e que teñan autorizado ou clasificado, conforme estableza a normativa turística no Rexistro de Empresas e Actividades Turísticas da Xunta de Galicia, o establecemento turístico para o que se solicita a axuda.

No caso de empresas, deben estar comprendidas na definición de pequena e mediana empresa (peme).


Publicación DOG

Ficha informativa sede electrónica

Válido dende: 
venres, 13 Xaneiro, 2023
Válido ate: 
luns, 13 Febreiro, 2023